Սեպտեմբերի 18-ին ժամը 14.00-ին Հայաստանի Ազգային պատկերասրահում տեղի կունենա «Տեսնել գույնով» բրիտանական ժամանակակից արվեստի ցուցահանդեսի բացումը, որը կտեւի մինչեւ սեպտեմբերի 25-ը: Միջոցառմանը ներկա կգտնվեն Հայաստանում Մեծ Բրիտանիայի դեսպան Չարլզ Լոնսդեյլը, Բրիտանական խորհրդի հայաստանյան գրասենյակի ղեկավար Արեւիկ Սարիբեկյանը եւ ՀՀ Մշակույթի փոխնախարար Արեւ Սամուելյանը:Հայաստանում ներկայացվելուց հետո «Տեսնել գույնով» ցուցահանդեսը կկազմակերպվի Ուկրաինայում, այնուհետեւ` Վրաստանում եւ Ադրբեջանում: Հայաստանյան ցուցահանդեսի ընթացքում կցուցադրվեն 1960-2007 թվականներին ստեղծված 31 լիտոգրաֆիական եւ մետաքսային տպագրության աշխատանքներ: Ցուցահանդեսը կազմակերպվում է «Ժամանակակից Բրիտանիա» ծրագրի շրջանակում:
Բրիտանացի արվեստագետները, օգտագործելով ներկապնակի բոլոր հնարավոր երանգները, ցուցադրում են գույնի եւ պատկերների համադրությունը, սեւ ու սպիտակի կողքին ընդգծում ամենատարբեր երանգները: «Չգիտեմ, թե ինչու եմ ընտրում գույները: Առաջին նրբերանգը գրեթե նշանակություն չունի, քանի որ այն շուտով ծածկվելու է մի երկրորդ, երրորդ նրբերանգով եւ այդպես շարունակ: Մեկն ուղղորդում է դեպի մյուսը: Այլ բառերով ասած … գույնը ի հայտ է գալիս հորինվացքայնորեն»,- գրում է սըր Հովարդ Հոդգքինը:
Աշխատանքներն ընտրված են Բրիտանական խորհրդի հավաքածուից: 1938 թվականից ի վեր Բրիտանական խորհուրդը հավաքում է արվեստի գործեր` նպատակ ունենալով ներկայացնել բրիտանական արվեստը միջազգայնորեն: Սկսելով ընդամենը մի քանի աշխատանքներից` այսօր Բրիտանական խորհրդի հավաքածուն ընդգրկում է շուրջ 8000 ժամանակակից արվեստի գործեր: Այն 20-րդ դարի բրիտանական արվեստի ամենախոշոր հավաքածուներից մեկն է աշխարհում:
news.am
